Voorstellings van die “ander” of die “vreemde” word grootliks
beïnvloed deur die voorsteller se eie historiese konteks. Wanneer hierdie konteks verander, gebeur dit dikwels dat die voorstelling
van die “ander” ook aangepas word by hierdie veranderings.
Hierdie artikel kyk kortliks hoedat die Franse voorstellings
van die Boere verskil in jeugromans wat vóór die Anglo-Boereoorlog
geskryf is van jeugromans wat oor die Anglo-Boereoorlog
handel.
Vóór die oorlog word die Boer as ’n Nederlandse afstammeling
beskryf wat byna agterlik en in uiterste eenvoud leef. Wanneer
die Anglo-Boereoorlog uitbreek, word die Boer egter ’n soort
alter ego vir die Franse wat indirek Frankryk se stryd teen die
Britte voortsit. Hierdie artikel bespreek die manier waarop die
Franse hulle voorstelling van die Boere aanpas sodat jong
Franse lesers met die Boere kan identifiseer.